طالب في الغربة

أول ما ابتدأت المشوار الميداني حسيت بذيج الصعوبة , مرضى تحت ايدك لازم تعالجهم , دكتور فوق راسك يراقبك بكل صغيرة و كبيرة , استشاري يمر عليك و يعطيك ذيج النظرة , و لغة مو لغتك تعال تفاهم فيها مع المريض خاصة بعد لما ييك واحد لهجته ما تنفهم , و انت ( اللي هو أنا ) ما تسوى عليك ترجف و اقول أنا شبلشني بها التخصص 00

هذي بس البداية , لكن الحين يا سلام تشتغل و انت تضحك و مرتاح وتحس الدوام وناسة ( تدرون توني طالب و للحين مانكديت بالشغل ) , المرضى اللي يطبون علينا أشكال و انواع , تذكرون مسلسل الناس أجناس حق داوود حسين و عبالرحمن العقل , بكل حلقة قصة و كاركتر عجيب , المرضى اللي عندنا بعضهم شخصيات عجيبة 000

احدى العيادات قي منطقة ابردين ياني مريض يحتاج جيك اب على اساس ان اول موعد له في العيادة , سألته اذا عنده حساسية أو ألم من اسنان معينة جاوبني لأ , سألته اذا يعاني من اي مرض أو ياخذ ادوية معينة جاوبني بعد لأ , بعدها سألته عن شغلات متعلقة بالاسنان وعادة أول سؤال نوجه للمريض جم مرة تفرش أسنانك باليوم ؟ , الحبيب و بكل ثقة جابني أنا صار لي 25 سنة مو مفرش أسناني ( علامة تعجب شكبرها طلعت فوق راسي ) أنا قلت بعد ما يحتاج أسأله اذا تستخدم خيط أو غسول اذا هذا الفرشة نسى شكلها شلون بالباجي , عموما الحين بجيك و افحص أسنانه , هو فتح حلجه و لا طبقة جير مغطية الاسنان كلها, الحبيب باني بنيان فوق أسنانه , انا اول شي بديت بالتنظيف علشان نشيل الجير ( استخدمنا التظيف الكهربائي ) , مسكينة الممرضة اللي تساعدني ملت و انا ايدي طاحت و انا احك بها الجير و صعب انك تنظفه , بالنهاية قدرت انظف اجزاء بس الباجي و حياتك ما يتكسرون , هني الدكتور قال لي و قف و احجز حق المريض موعد ثاني انا هني حسيت بالفرج , المهم أخذت المريض عشان أحجز له موعد و انا ماشي معاه قال احس اسناني صارت نظيفة و صحية ( هذا و احنا ما شلنا كل الجير و لا لما نخلص العلاج كامل شبي يقول ) !!00

مو قف ثاني اعجب و اغرب , احنا دايما ننصح مرضانا باستخدام معجون الاسنان المحتوي على مادة الفلورايد ( لانها المادة الفعالة في منع تسوس الاسنان ) واغلبها الحين فيها فلورايد , هالمرة الحبيب اللي ياني سألته شنو نوع المعجون اللي تستخدمه جاوبني معجون اعشاب طبيعية , فرديت عليه يحتوي على الفلورايد , هني ثارت الثائرة , و سكتني وقال أنت مقتنع بالفلورايد ؟ 00 جاوبته بناء على الدراسات والابحاث والتجارب على هالمادة واثرها الايجابي في منع و تقليل تسوس الاسنان اي نعم انا مقتنع فيها , قال لأ انتو غلطانين هذي مادة سامة استخدمها الالمان في الحرب العالمية مع الفوسفور كسلاح لتضعيف العقول و اصابتها بالجنون و انتو هني تستخدمونها على المرضى اناهني قلت اوووه هذا طلع بطل زمانه وشريف روما , عموما ً انا ابتسمت بو يهه و قلتله عن دراسة فعلية سووها العلماء و شافوا اثرها في تقليل التسوس , بو الشباب ماقنتع وقالي انت ما تعرف شي! 0

بس سألني , اسناني وايد متسوسة مع اني افرش ترا شالسبب ؟ ( الحبيب مو مقتنع بالفلورايد و يبي اسنانه صحية و بيضة بله وين اصرفها انا !) 00

موقف ثالث كان مع مريضة تحتاج طقم اسنان , العلاج شوية يطول لان لازم تاخذ قالب و بعدين تصنع واكس وتجربه عشان تشوف طريقة انطباق الاسنان و بعدها قالب ثاني و تجريب طقم اسنان مصنوع من و اكس واخرها الطقم النهائي , مسكينة اهي متأذية لان ماعندها اسنان و ودها تاكل وايد وجبات , الحمدلله مشينا بالخطوات كلها تمام التمام ليما وصلنا الى اخر موعد اللي فيه راح نجرب الطقم النهائي و نعطيه المريض , هذاك اليوم يبت المريضة , و اول ما قعدت على الكرسي جان تطلع من جنطتها تفاح و تحطه على الطاولة , بديهيا ً انا سألته تفاح حق شنو ؟ قالت بس مليت و انا انطر ابي اكل تفاح مثل الناس ابي اعض بأسناني انا ضحكت و قلتلها حاضر على امرج , الحمدلله جربنا الطقم النهائي و ضبط حزته اهي قالت الحين اقدر اكل التفاح

سوينا لها مراجعة الاسبوع اللي بعده و هي ياية الابتسامة شاقة الويه و كاشخة ولا بايبتلي سوالف حلويات و جيز كيك قالت هذا لك تستاهل ( طبعا اللي بالعيادة يشوفون و يخزون انا بعد نفخت بنفسي و ما صدقت!00 )

هذي بعض المواقف وغيرها كثير , انا ماكنت اقصد من ورا هذي الموالقف الاستهزاء و التمصخر لا حشا بس حبيت اصور لكم احنا تعترضنا مواقف و حالات متعددة منها المضحكة و منها المحزنة( خاصة لما ييك المريض بألم وويه متفوخ ) , ومنها الصعب وذاك السهل الحلو انك تتعامل مع طبيعة هالبشر و لازم يكون عندك ضمير في شغلك هذي ارواح ناس وبشر لازم تكون مخلص حق ربك في علاج هالناس و تخفيف مأساتهم و مايكون عندك تفريق بين فلان و علان الناس أجناس و لازم تعامل الجميع على حسب أجناسهم

الحمدلله على الوازع اللي في نفسي وهذا اللي محببني بطب الاسنان

تشجعت في كتابة هذا الموضوع عندما قرأت مدونة الاستاذة سيدة التنبيب , فشكرا ً لك يا سيدة

الصورة- التقطت فبراير 2009

Model : my Flatmate Mohammed Al saraf

مجلسنا الموقر

اليوم كنا على موعد مع اجتماع اقامه اتحاد الطلبة لجامعة دندي , فجامعة دندي لها استثمارات مع احدى الشركات التي تخصص جزء من ارباحها لتمويل الدولة الاسرائيلية , فكان الهدف من وراء هذا التجمع هو قطع العلاقة مع هذه الشركة و اغلاق باب الاستثمارات , فقرر الاتحاد الا ان يجمع طلبة الجامعة لابداء رأيهم اذا كانوا موافقين لهذا القرار ام لا , فكانت هناك مناظرة لمدة لاتزيد عن15 دقيقة لكلا الطرفين اعني بذلك الطرف المؤيد و المعارض , و من ثم يفتح الباب لبقية الطلبة الحضور ليبدوا آراءهم و لكل طالب الحق في التكلم لمدة 3 الى 5 دقائق حتى يتسنى لاكبر عدد من الطلبة أن يشاركواا , كان الجو مليئا ً بالحماس الديموقراطي فذلك المتعصب للقضية و يبدي رأيه بأدلة تاريخية , و آخر يتكلم بقلبه و عاطفته مستذكرا ً اطفال غزة , و آخر يعارض كلام احد الجماهير لانه انجرى الى موضوع سياسي متعلق بالدولتين , و هناك رئيس يدير هذا الاجتماع لكنه لا يمسك بمطرقة و لاحتى جهاز ميكروفون رئيسي ليقطع على احد المتكلمين , كان فقط يقول هذه الكلمة ( أرجوك كن في صلب الموضوع , أو شكرا لقد انتهى الوقت ) كان الجمهور يصفق و يحيي المؤيد و المعارض فوجهة النظر و ابداء الرأي حرية مكفولة للجميع و لا بد أن تُحترم , بعد ما يقارب الساعة ( حسب جدول الاجتماع ) اعلن البدء بالتصويت على الاقتراح , فرفعت الايدي واذا بها كثير فتمت الموافقة على القرار بكل يسر وسهولة , و حتى بعد التصويت شكر المؤيدين اولئك المعارضين على شجاعتهم في ابداء رأيهم و شكروهم على الديموقراطية التي آمنوا بها فصفق الجمهور تحية للديموقراطية 0

خرجت من ذلك المسرح و تجول بخاطري الصورة الجميلة للمناظرة , فهي شكل مصغر للاستجواب , و ما اعجبني رقي الحديث, فمن يتكلم يلتزم بالوقت المحدد له , و لا ترى في حديثه الفاظ شائبة فهو يتكلم بما هو متعلق بالموضوع و حتى اذا خرج عن النص الزمه رئيس الاتحاد بالموضوع لا غير , هؤلاء هم طلبة اكاديميين لم يرتقوا لفن التعامل الديموقراطي و لكنهم تميزا فيه 00
فعتبي علم مانراه في ساحتنا السياسية
فمجلسنا يعج بالصراخ و و الالفاظ النائية عن مجتمعنا وحتى وصل إلى التشابك بالايدي ولعل الحادثة الاخيرة بين النائبين الدقباسي و الحربش خير دليل
كل النواب يريدون التحدث وقبل أن يتلفظ النائب بأي كلمة يطلب من الرئيس و قت اضافي ( و هو للحين مابلش بياخذ وقته و وقت غيره) و عندما نتتهي فترته الزمنية و يقطع الصوت عن الميكروفون تراه يكمل حديثه معتمدا ً على قوة احباله الصوتية ( ما له داعي اقول منو)00
مجلسنا شيء غريب فاذا لم يوافق طرف معين الاخر برأيه اشتد غضبه كان سهلا عليه أن يرميه بالكأس ( بعد في واحد ما يذكر حذفة القلاس)00
مجلسنا اصبح مكانا ً لتثبيت المواقف فصارت عادة لكل حكومة تتشكل أن ينسحب نواب قبل القسم ( الله على الموقف, كان في مواقف وايدة الزم على النواب ان ينسحبون فيها بس تدرون لازم الحكومة هي اللي دايما ً غلطانة)00
اصبحت اتأسف على جاسم الخرافي ففي كل جلسة تتورم يداه من كثرة الامساك والضرب بالمطرقة ( و ما كو فايدة , تصدقون اتوقع كل شهر يبدلون مطرقته !)00
أنا لا أذم النواب و الحكومة و لا أقول انهم لا يعملون ولا يأدوون ما عليهم ( بس الله يهداهم بعض الشغلات اللي نشوفها تبط الجبد)00

اتمنى أننا نتغير و نرسم انطباعا ً جميلا ً عن ديموقراطيتنا التي أسست

منذ 1961 , حتى نخلد سياستنا الموقرة
والله من وراء القصد

الصورة - للأستاذ الصديق خالد المسعود